వ్యవసాయ రంగానికి అధిక ప్రాధాన్యతతో రుణాలు మంజూరు చేయాలి
ప్రత్యేక రుణమేళాలు నిర్వహించాలి: జిల్లా కలెక్టర్ కె. హైమావతి
ప్రజా పిలుపు / తెలంగాణ / సిద్దిపేట : ప్రాధాన్యత రంగాలతో పాటు వ్యవసాయ రంగానికి అధిక ప్రాధాన్యత ఇచ్చి అర్హులైన వారికి రుణాలు మంజూరు చేయాలని జిల్లా కలెక్టర్ కె. హైమావతి బ్యాంకు అధికారులను ఆదేశించారు.శుక్రవారం ఐడీఓసీ సమావేశ మందిరంలో నిర్వహించిన జిల్లా స్థాయి కన్సల్టేటివ్ కమిటీ, జిల్లా స్థాయి సమీక్షా సమావేశానికి కలెక్టర్ ముఖ్య అతిథిగా హాజరయ్యారు. ఈ సందర్భంగా ఆమె మాట్లాడుతూ జిల్లాలో ప్రాధాన్యత రంగాలకు నిర్దేశించిన రుణ లక్ష్యాల సాధనలో పురోగతి బాగానే ఉందని, అయితే వ్యవసాయ రంగానికి మరింత ప్రాధాన్యత ఇవ్వాల్సిన అవసరం ఉందన్నారు. అవసరమైతే రైతుల కోసం ప్రత్యేక రుణమేళాలు ఏర్పాటు చేసి రుణాలు అందించాలని సూచించారు. వివిధ శాఖల ద్వారా గ్రౌండింగ్ కోసం వచ్చిన దరఖాస్తులను పెండింగ్లో ఉంచకుండా సత్వరమే పరిష్కరించాలని ఆదేశించారు.నిరుద్యోగులకు ఉపాధి అవకాశాలు కల్పించే దిశగా పరిశ్రమలు, ఉపాధి కల్పన శాఖలు, బ్యాంకులు సమన్వయంతో పనిచేయాలని సూచించారు. రబీ సీజన్లో రుణాల కోసం వచ్చే రైతులకు అవసరమైన సహకారం అందించాలని బ్యాంకు అధికారులను ఆదేశించారు.ఎస్సీ కార్పొరేషన్కు సంబంధించిన బ్యాంకుల్లో పెండింగ్లో ఉన్న దరఖాస్తులపై వెంటనే స్పందించి అర్హులైన లబ్ధిదారులకు ప్రయోజనం చేకూరేలా చర్యలు తీసుకోవాలని సూచించారు. దరఖాస్తులు తిరస్కరణకు గురయ్యే పరిస్థితి ఉంటే, అర్హులైన లబ్ధిదారులకు అవసరమైన సహకారం అందించాలని అన్నారు.ప్రాధాన్యత, వ్యవసాయ రంగాల్లో పనితీరు తక్కువగా ఉన్న బ్యాంకులు ప్రత్యేక రుణమేళాలు నిర్వహించి సెప్టెంబర్లోగా నిర్దేశించిన లక్ష్యాలను సాధించాలని కలెక్టర్ ఆదేశించారు. తదుపరి సమావేశం నాటికి లక్ష్యాలను పూర్తి చేసిన ఉత్తమ పనితీరు కనబరిచిన ముగ్గురు బ్యాంకు అధికారులను సత్కరించాలని సూచించారు.మహిళా సంఘాలకు నిర్దేశించిన మేరకు రుణాలు మంజూరు చేసి లక్ష్యాలను సాధించాలని, నిర్లక్ష్యంగా వ్యవహరించే వారిపై చర్యలు తీసుకుంటామని కలెక్టర్ హెచ్చరించారు. చీకోడ్, జగదేవపూర్, కోహెడ ఎస్బీఐ శాఖల బదిలీతో పాటు బ్యాంకింగ్ సేవలు అందుబాటులో లేని చెప్యాల, ఎల్లారెడ్డిపేట, కొండపోచమ్మ దేవాలయం రెవెన్యూ గ్రామాల్లో నూతన బ్యాంకు శాఖల ఏర్పాటుకు వచ్చిన ప్రతిపాదనలకు జిల్లా స్థాయి కమిటీ (డీఎల్సీ) ఆమోదం తెలిపింది.ఈ సమావేశంలో ఎల్డీఎం హరిబాబు, డీఆర్డీఓ రమేష్, ఆర్బీఐ ఎల్డీఓ వెన్న శ్రీనివాస్, ఎస్బీఐ ఆర్ఎం మారుతి, టీజీబీ ఆర్ఎం రాజయ్య, ఏండీసీసీబీ జీఎం శ్రీనివాస్, ఆర్ శెట్టి డైరెక్టర్ తదితరులు పాల్గొన్నారు.
Admin
ప్రజా పిలుపు
మరిన్ని వార్తలు
Developed By :
