రేపు సిద్దిపేట జిల్లాలో మెగా ప్లాంటేషన్*
*ప్రతి గ్రామ పంచాయతీలో 1,000 మొక్కలు నాటాలి: జిల్లా కలెక్టర్ కే. హైమావతి
ప్రజా పిలుపు / తెలంగాణ / సిద్దిపేట : జిల్లావ్యాప్తంగా ఈనెల 25వ తేదీ మంగళవారం అన్ని గ్రామ పంచాయతీల పరిధిలో మెగా ప్లాంటేషన్ కార్యక్రమాన్ని నిర్వహించి, ప్రతి గ్రామ పంచాయతీలో 1,000 మొక్కలు నాటాలని జిల్లా కలెక్టర్ కే. హైమావతి అధికారులను ఆదేశించారు.కలెక్టరేట్ సమావేశ మందిరంలో జిల్లా అధికారులతో నిర్వహించిన సమావేశంలో కలెక్టర్ మాట్లాడుతూ.. జిల్లాలో గత రెండు రోజులుగా వర్షాలు కురుస్తుండటంతో మరో రెండు, మూడు రోజులు వర్షాలు కొనసాగే అవకాశం ఉందని తెలిపారు. మొక్కలు నాటేందుకు ఇది అనుకూల సమయమని పేర్కొన్నారు. వనమహోత్సవం కార్యక్రమంలో భాగంగా జిల్లాలో 17.68 లక్షల మొక్కలు నాటాలని లక్ష్యంగా పెట్టుకున్నట్లు తెలిపారు. ఇప్పటికే రెండు లక్షలకు పైగా మొక్కలు నాటేందుకు గుంతలు సిద్ధంగా ఉన్నాయని, మిగిలిన గుంతలను కూడా త్వరగా తవ్వి మొక్కలు నాటి జియో ట్యాగింగ్ చేయాలని సూచించారు.గ్రామ పంచాయతీలతో పాటు అన్ని మున్సిపాలిటీల్లో నిర్దేశిత లక్ష్యాల మేరకు మొక్కలు నాటాలని, ప్రభుత్వ విద్యా సంస్థలు, రెసిడెన్షియల్ విద్యాసంస్థలు, ఆస్పత్రులు, ఇరిగేషన్ శాఖకు చెందిన ఖాళీ స్థలాల్లోనూ విస్తృతంగా మొక్కలు నాటాలని కలెక్టర్ ఆదేశించారు. కార్యక్రమాల్లో ప్రజాప్రతినిధులను భాగస్వామ్యం చేయాలని, ప్రజలను పెద్ద సంఖ్యలో భాగస్వాములను చేస్తూ శాఖల వారీగా నిర్దేశించిన లక్ష్యాలను పూర్తి చేయాలని తెలిపారు. మండల ప్రత్యేక అధికారులు కార్యక్రమాలను పర్యవేక్షించాలని ఆదేశించారు.వర్షాలు కురుస్తున్న నేపథ్యంలో దోమల వ్యాప్తి పెరిగే అవకాశం ఉన్నందున అన్ని రెసిడెన్షియల్ పాఠశాలలు, ప్రభుత్వ పాఠశాలలు, అంగన్వాడీ కేంద్రాల్లో మంగళవారం ప్రత్యేక పారిశుద్ధ్య కార్యక్రమాలు నిర్వహించాలని సూచించారు. టీబీ ముక్త్ భారత్ కార్యక్రమంలో భాగంగా జిల్లాలోని 780 మంది టీబీ బాధితులు క్రమం తప్పకుండా మందులు వినియోగిస్తున్నారా లేదా అనే అంశంపై వైద్య శాఖ అధికారులతో సమీక్షించాలని ఆదేశించారు.సెన్సెస్-2027కు సంబంధించి వివిధ శాఖలకు ప్రొఫార్మాలు అందించినట్లు తెలిపారు. ఆయా ప్రొఫార్మాల ప్రకారం అవసరమైన వివరాలను అందించాలని అధికారులను ఆదేశించారు.ఈ సమావేశంలో జిల్లా అదనపు కలెక్టర్ లక్ష్మీకిరణ్, డీఆర్ఓ నాగరాజమ్మ, వివిధ శాఖల జిల్లా అధికారులు తదితరులు పాల్గొన్నారు.అనంతరం మండల స్థాయి అధికారులు, మున్సిపల్ కమిషనర్లతో టెలీకాన్ఫరెన్స్ నిర్వహించిన జిల్లా కలెక్టర్ మెగా ప్లాంటేషన్ కార్యక్రమంపై తగిన ఆదేశాలు జారీ చేశారు.
Admin
ప్రజా పిలుపు
మరిన్ని వార్తలు
Developed By :
