బీరంగూడ ఆలయ అభివృద్ధికి అధికారుల స్థల పరిశీలన
ప్రజా పిలుపు / తెలంగాణ / సంగారెడ్డి : బీరంగూడ గుట్టపై కొలువుదీరిన శ్రీశ్రీశ్రీ భ్రమరాంబికా మల్లికార్జున స్వామి దేవస్థానం అభివృద్ధి పనులపై దేవాదాయ ధర్మాదాయ శాఖ అధికారులు శనివారం స్థల పరిశీలన చేపట్టారు. దేవాదాయ శాఖ ఎగ్జిక్యూటివ్ ఇంజనీర్ శ్రీనివాస్ శర్మ, అసిస్టెంట్ ఇంజనీర్ తులసీరామ్, అసిస్టెంట్ స్థపతి వెంకటేశ్వరరావు ఆలయాన్ని సందర్శించారు.ఆలయ కార్యనిర్వహణ అధికారి దేవనాదం, చైర్మన్ సుధాకర్ యాదవ్, పాలకమండలి సభ్యులతో కలిసి ఆలయ ప్రాంగణం, పరిసర ప్రాంతాలను అధికారులు పరిశీలించారు. భక్తులకు మెరుగైన సౌకర్యాలు కల్పించేందుకు చేపట్టాల్సిన అభివృద్ధి పనులకు అవసరమైన స్థలాలను గుర్తించారు. ముఖ్యంగా శివాలయ విగ్రహం ఏర్పాటు, 16 వసతి గృహాలు, హోమశాల, వేద పాఠశాల, సౌర విద్యుత్ వ్యవస్థ తదితర సౌకర్యాల ఏర్పాటుపై చర్చించారు.ఆలయ భవిష్యత్ అవసరాలు, భక్తుల సౌకర్యాలను దృష్టిలో ఉంచుకుని అభివృద్ధి పనులకు సంబంధించిన ప్రణాళికలు, అంచనాలు, కొటేషన్లు సిద్ధం చేయనున్నట్లు అధికారులు తెలిపారు. అవసరమైన ప్రక్రియను పూర్తి చేసి పనులను త్వరితగతిన ప్రారంభించేలా చర్యలు చేపడతామని పేర్కొన్నారు.ఆలయాన్ని మరింత సుందరంగా తీర్చిదిద్దడంతో పాటు భక్తులకు మెరుగైన సౌకర్యాలు అందుబాటులోకి తీసుకురావడమే లక్ష్యంగా అభివృద్ధి కార్యక్రమాలు చేపట్టనున్నట్లు ఆలయ అధికారులు తెలిపారు. కార్యక్రమంలో ఆలయ పాలకమండలి సభ్యులు, సిబ్బంది తదితరులు పాల్గొన్నారు.
Admin
ప్రజా పిలుపు
మరిన్ని వార్తలు
Developed By :
