12 గంటల్లోనే బాలుర ఆచూకీ గుర్తింపు
షోలాపూర్‌లో ఇద్దరు చిన్నారుల జాడ.. తల్లిదండ్రులకు అప్పగింత
ప్రజా పిలుపు / తెలంగాణ / సంగారెడ్డి : పటాన్‌చేరు, :తప్పిపోయిన ఇద్దరు బాలుర ఆచూకీని పటాన్‌చేరు పోలీసులు 12 గంటల్లోనే గుర్తించి క్షేమంగా తల్లిదండ్రులకు అప్పగించారు. పోలీసుల వివరాల ప్రకారం.. సంగారెడ్డి జిల్లా ఇంద్రేశం గ్రామానికి చెందిన ఎముల సాయిచరణ్‌ కుమారులు హర్ష (13), దక్ష్‌ (11) ఈ నెల 5న సాయంత్రం 4 గంటల సమయంలో పటాన్‌చేరు శ్రీ వెంకటేశ్వర కాలనీలోని నానమ్మ ఇంటి నుంచి బయటకు వెళ్లారు. తిరిగి రాకపోవడంతో కుటుంబ సభ్యులు పరిసర ప్రాంతాల్లో వెతికినా ఫలితం లేకపోవడంతో పోలీసులకు ఫిర్యాదు చేశారు.దీంతో పటాన్‌చేరు పోలీసులు కేసు నమోదు చేసి గాలింపు చేపట్టారు. ఇన్‌స్పెక్టర్‌ ఎం. రవీందర్‌ పర్యవేక్షణలో ఎస్‌ఐ తాండర్‌పల్లి వినోద్‌ దర్యాప్తు చేపట్టారు. ప్రత్యేక బృందాల ద్వారా గాలింపు కొనసాగించి మహారాష్ట్రలోని షోలాపూర్‌లో బాలురను గుర్తించారు. కేసు నమోదైన 12 గంటల్లోనే వారిని క్షేమంగా తల్లిదండ్రుల వద్దకు చేర్చారు. సత్వరమే స్పందించి తమ పిల్లలను అప్పగించిన పోలీసులకు కుటుంబ సభ్యులు కృతజ్ఞతలు తెలిపారు.
Admin
ప్రజా పిలుపు
మరిన్ని వార్తలు
Developed By :
