అమీన్‌పూర్‌లో గంజాయి పట్టివేత
ఒడిశా నుంచి తరలింపు… ముగ్గురు అరెస్ట్, రూ.17 లక్షల మాదకద్రవ్యాలు స్వాధీనం
ప్రజా పిలుపు / తెలంగాణ / సంగారెడ్డి : అమీన్‌పూర్ పోలీస్ స్టేషన్ పరిధిలో మాదకద్రవ్యాల అక్రమ రవాణాను పోలీసులు భగ్నం చేశారు. ఒడిశా రాష్ట్రం నుంచి హైదరాబాద్‌కు గంజాయిని తరలిస్తున్న ముగ్గురు నిందితులను అదుపులోకి తీసుకుని, 34.50 కిలోల ఎండిన గంజాయిని స్వాధీనం చేసుకున్నారు.పోలీసులు తెలిపిన వివరాల ప్రకారం, ఒడిశా రాష్ట్రంలోని మల్కంగిరి జిల్లా నుంచి బొలెరో వాహనంలో గంజాయిని తరలిస్తున్నట్లు విశ్వసనీయ సమాచారం అందడంతో ప్రత్యేక నిఘా బృందం, అమీన్‌పూర్ పోలీసులు కలిసి సుల్తాన్‌పూర్ బయలుద్వారం వద్ద వాహనాల తనిఖీలు నిర్వహించారు. ఈ క్రమంలో అనుమానాస్పదంగా వచ్చిన వాహనాన్ని ఆపి తనిఖీ చేయగా, ప్రత్యేక అరల్లో దాచిపెట్టిన 17 ప్యాకెట్లలో 34.50 కిలోల ఎండిన గంజాయి లభ్యమైంది. దీని విలువ సుమారు రూ.17 లక్షలు ఉంటుందని పోలీసులు తెలిపారు.ఈ కేసులో ముగ్గురు నిందితులను అరెస్ట్ చేసిన పోలీసులు, గంజాయితో పాటు బొలెరో వాహనం, రెండు సెల్‌ఫోన్లను స్వాధీనం చేసుకున్నారు. విచారణలో ఒడిశా నుంచి హైదరాబాద్‌కు గంజాయి సరఫరా చేస్తున్నట్లు నిందితులు అంగీకరించినట్లు వెల్లడించారు. పరారీలో ఉన్న ప్రధాన నిందితుడి కోసం గాలింపు కొనసాగుతోందని తెలిపారు.ఈ ఘటనపై మాదకద్రవ్యాల నిరోధక చట్టం కింద కేసు నమోదు చేసి దర్యాప్తు కొనసాగిస్తున్నట్లు పోలీసులు పేర్కొన్నారు. మాదకద్రవ్యాల అక్రమ రవాణా, విక్రయాలకు సంబంధించిన సమాచారం తెలిసిన వారు 1908 టోల్‌ఫ్రీ నంబర్‌కు లేదా సమీప పోలీస్ స్టేషన్‌కు తెలియజేయాలని అమీన్‌పూర్ పోలీసులు కోరారు.
Admin
ప్రజా పిలుపు
మరిన్ని వార్తలు
Developed By :
