తెల్లాపూర్ రైల్వే అండర్‌పాస్‌కు రూ.21 కోట్ల మంజూరు
ప్రజా పిలుపు / తెలంగాణ / సంగారెడ్డి : పటాన్చెరు నియోజకవర్గం తెల్లాపూర్ డివిజన్ పరిధిలోని తెల్లాపూర్ నుంచి విద్యుత్‌నగర్‌కు వెళ్లే మార్గంలోని రైల్వే అండర్‌పాస్ సమస్యకు పరిష్కారం లభించనుంది. ఇరుకుగా ఉన్న రైల్వే అండర్‌పాస్ కారణంగా గత 25 ఏళ్లుగా ప్రజలు తీవ్ర ఇబ్బందులు ఎదుర్కొంటున్నారు. ఈ సమస్యను పరిష్కరించేందుకు ఎంపీ రఘునందన్ రావు చర్యలు చేపట్టారు.తెల్లాపూర్ ప్రాంత ప్రజలు ఎదుర్కొంటున్న ఇబ్బందులను కేంద్ర రైల్వే శాఖ మంత్రి దృష్టికి తీసుకెళ్లి, అండర్‌పాస్ అభివృద్ధి పనుల కోసం రూ.21 కోట్ల నిధులు మంజూరు చేయించారు. నిధులు మంజూరైన నేపథ్యంలో రైల్వే శాఖ అధికారులు, మహానగర పాలక సంస్థ అధికారులతో కలిసి ఎంపీ రఘునందన్ రావు అండర్‌పాస్ ప్రాంతాన్ని క్షేత్రస్థాయిలో పరిశీలించారు.అండర్‌పాస్ విస్తరణ, అభివృద్ధి పనులను చేపట్టే సమయంలో ఇరువైపులా ఉన్న కాలనీల ప్రజలకు ఎలాంటి ఇబ్బందులు కలగకుండా చర్యలు తీసుకోవాలని అధికారులకు సూచించారు. ప్రజల రాకపోకలకు అంతరాయం లేకుండా పనులను ప్రణాళికాబద్ధంగా చేపట్టి త్వరితగతిన పూర్తి చేయాలని ఆదేశించారు.గత 25 ఏళ్లుగా ఈ మార్గంలో ఇరుకైన అండర్‌పాస్ కారణంగా వాహనదారులు, పాదచారులు తీవ్ర ఇబ్బందులు పడుతున్నారని, సమస్య పరిష్కారంతో తెల్లాపూర్, విద్యుత్‌నగర్ పరిసర ప్రాంతాల ప్రజలకు ఎంతో ప్రయోజనం కలుగుతుందని తెలిపారు. పనుల సమయంలో స్థానిక ప్రజల సమస్యలను పరిగణనలోకి తీసుకుని అవసరమైన చర్యలు చేపట్టాలని అధికారులకు పలు సూచనలు చేశారు.రైల్వే అధికారులు, మహానగర పాలక సంస్థ అధికారులు సమన్వయంతో పనిచేసి అండర్‌పాస్ పనులను నాణ్యతతో పూర్తి చేయాలని సూచించారు. రూ.21 కోట్ల నిధులు మంజూరు కావడంతో ఎన్నో ఏళ్లుగా పెండింగ్‌లో ఉన్న సమస్యకు శాశ్వత పరిష్కారం లభించనుందని స్థానికులు ఆశాభావం వ్యక్తం చేస్తున్నారు.
Admin
ప్రజా పిలుపు
మరిన్ని వార్తలు
Developed By :
