ప్రజావాణికి 68 దరఖాస్తులు
పెండింగ్ ఫిర్యాదుల పరిష్కారంలో అలసత్వం వద్దు.. అదనపు కలెక్టర్ సంగీత
ప్రజా పిలుపు / తెలంగాణ / సంగారెడ్డి : సంగారెడ్డి, నవంబర్ 2: ప్రజా సమస్యల పరిష్కార వేదిక ప్రజావాణికి వచ్చే దరఖాస్తులను నిర్లక్ష్యం చేయకుండా వేగవంతంగా పరిష్కరించాలని, పెండింగ్ దరఖాస్తుల విషయంలో అధికారులు అలసత్వం వహించరాదని సంగారెడ్డి జిల్లా అదనపు కలెక్టర్ సంగీత అధికారులను ఆదేశించారు. సోమవారం సంగారెడ్డి జిల్లా కలెక్టరేట్ సమావేశ మందిరంలో నిర్వహించిన ప్రజావాణి కార్యక్రమంలో ఆమె ప్రజల నుంచి వివిధ సమస్యలకు సంబంధించిన వినతులను స్వీకరించారు.జిల్లాలోని వివిధ ప్రాంతాల నుంచి ప్రజలు తమ సమస్యల పరిష్కారం కోసం ప్రజావాణిని ఆశ్రయిస్తున్నారని, వారి సమస్యలను అధికారులు ప్రాధాన్యతతో పరిశీలించి సత్వర న్యాయం జరిగేలా చర్యలు తీసుకోవాలని సూచించారు. ప్రజలు ఎంతో ఆశతో తమ సమస్యలను అధికారుల దృష్టికి తీసుకువస్తారని, వారి దరఖాస్తులను క్షుణ్ణంగా పరిశీలించి నిర్ణీత గడువులోగా పరిష్కరించాల్సిన బాధ్యత సంబంధిత శాఖల అధికారులపై ఉందని స్పష్టం చేశారు.సోమవారం నిర్వహించిన ప్రజావాణి కార్యక్రమానికి మొత్తం 68 దరఖాస్తులు అందాయి. వీటిలో సంగారెడ్డి నుంచి 21, నారాయణఖేడ్ నుంచి 3, జహీరాబాద్‌ నుంచి 2, సంగారెడ్డి కలెక్టరేట్‌లో 42 దరఖాస్తులు వచ్చాయి. అందోల్‌ డివిజన్‌ నుంచి ఎలాంటి వినతులు అందలేదని అధికారులు వెల్లడించారు.వివిధ శాఖల పరిధిలో పరిష్కారం కాకుండా పెండింగ్‌లో ఉన్న ఫిర్యాదులను వెంటనే పరిష్కరించాలని అదనపు కలెక్టర్ ఆదేశించారు. ముఖ్యమంత్రి ప్రజావాణికి సంబంధించిన పెండింగ్ దరఖాస్తులపై ప్రత్యేక దృష్టి సారించాలని సూచించారు. ప్రతి దరఖాస్తును క్షుణ్ణంగా పరిశీలించి, సమస్య తీవ్రతను బట్టి ప్రాధాన్యత క్రమంలో పరిష్కరించాలన్నారు. దరఖాస్తుదారులను కార్యాలయాల చుట్టూ తిప్పించుకోకుండా, వారి సమస్యలకు బాధ్యతాయుతంగా పరిష్కారం చూపాలని అధికారులకు స్పష్టం చేశారు.ఈ కార్యక్రమంలో జెడ్పీ సీఈఓ జానకిరెడ్డి, సోషల్ వెల్ఫేర్‌ డీడీ అఖిలేష్‌ రెడ్డి, జిల్లా బీసీ సంక్షేమాధికారి జగదీష్‌, జిల్లా సంక్షేమాధికారిణి లలితకుమారి, జిల్లా వైద్య ఆరోగ్యశాఖాధికారిణి లలితాదేవి, డీఏహెచ్‌ఓ వసంతకుమారి, డీఎల్ఎస్ఏ అడ్వకేట్‌ తదితర వివిధ శాఖల అధికారులు పాల్గొన్నారు.
Admin
ప్రజా పిలుపు
మరిన్ని వార్తలు
Developed By :
