సర్వాయి పాపన్న గౌడ్‌కు ఘన నివాళి
ప్రజా పిలుపు / తెలంగాణ / సంగారెడ్డి : ఇస్నాపూర్ మున్సిపాలిటీ పరిధిలోని తన కార్యాలయం వద్ద సర్దార్ సర్వాయి పాపన్న గౌడ్ జయంతిని పురస్కరించుకుని ఆయన చిత్రపటానికి పూలమాల వేసి పటాన్చెరు మండల ఇన్‌చార్జి, మాజీ జెడ్పీటీసీ గడీల శ్రీకాంత్ గౌడ్ ఘనంగా నివాళులర్పించారు.ఈ సందర్భంగా గడీల శ్రీకాంత్ గౌడ్ మాట్లాడుతూ.. సర్దార్ సర్వాయి పాపన్న గౌడ్ తెలంగాణ చరిత్రలో ధైర్యసాహసాలకు, సామాజిక సమానత్వానికి, అణగారిన వర్గాల హక్కుల కోసం పోరాడిన మహనీయుడని కొనియాడారు. సామాన్య ప్రజలపై జరుగుతున్న దోపిడీ, అన్యాయాలకు వ్యతిరేకంగా పోరాడి ప్రజల్లో ఆత్మవిశ్వాసాన్ని నింపిన గొప్ప వీరుడు పాపన్న గౌడ్ అని అన్నారు.సమాజంలోని అన్ని వర్గాల ప్రజలకు సమాన హక్కులు, గౌరవం దక్కాలనే ఆశయంతో సర్వాయి పాపన్న గౌడ్ సాగించిన పోరాటం నేటి తరానికి స్ఫూర్తిదాయకమని తెలిపారు. ఆయన ధైర్యం, పట్టుదల, ప్రజా సంక్షేమం పట్ల చూపిన నిబద్ధతను ప్రతి ఒక్కరూ ఆదర్శంగా తీసుకోవాలని పిలుపునిచ్చారు.తెలంగాణ చరిత్రలో సర్దార్ సర్వాయి పాపన్న గౌడ్ చేసిన సేవలు, సాగించిన పోరాటాలను భావితరాలకు తెలియజేయాల్సిన బాధ్యత ప్రతి ఒక్కరిపై ఉందన్నారు. ఆయన ఆశయాల సాధన కోసం సమాజ అభివృద్ధికి ప్రతి ఒక్కరూ కృషి చేయాలని సూచించారు.ఈ కార్యక్రమంలో భారత రాష్ట్ర సమితి నాయకులు కృష్ణ గౌడ్, దీపక్ గౌడ్, షకీల్, వినయ్ గౌడ్, సల్మాన్, షర్పుద్దీన్, వినీత్ రెడ్డి, ఆర్బాజ్, సాయి కుమార్ తదితరులు పాల్గొన్నారు.
Admin
ప్రజా పిలుపు
మరిన్ని వార్తలు
Developed By :
