రణరంగంగా మారిన నర్సాపూర్ చౌరస్తా
పాలిటెక్నిక్ విద్యార్థుల రాస్తారోకో.. పోలీసులు, విద్యార్థుల మధ్య తోపులాట
ప్రజా పిలుపు / తెలంగాణ / మెదక్ : పాలిటెక్నిక్ విద్యార్థుల ఆందోళనతో నర్సాపూర్ చౌరస్తా మంగళవారం రణరంగంగా మారింది. మెదక్ జిల్లా శివంపేట మండలం గోమారం సమీపంలోని ప్రభుత్వ పాలిటెక్నిక్ కళాశాలకు చెందిన సుమారు 150 మంది విద్యార్థులు నూతనంగా తీసుకొచ్చిన శ్రీశక్తి విధానాన్ని తొలగించాలని డిమాండ్ చేస్తూ చౌరస్తాలో ధర్నా, రాస్తారోకో చేపట్టారు.సుమారు 40 నిమిషాల పాటు విద్యార్థులు మానవహారం నిర్వహించడంతో చౌరస్తాలో నాలుగు వైపులా భారీగా వాహనాలు నిలిచిపోయాయి.సమాచారం అందుకున్న ఎస్సై రంజిత్ కుమార్ రెడ్డి సిబ్బందితో అక్కడికి చేరుకుని విద్యార్థులను అక్కడి నుంచి పంపించే ప్రయత్నం చేశారు. అయితే విద్యార్థులు నినాదాలు చేస్తూ ఆందోళన విరమించేందుకు నిరాకరించడంతో పోలీసులు, విద్యార్థుల మధ్య తోపులాట చోటుచేసుకుంది.విషయం తెలుసుకున్న ఎమ్మెల్యే సునీత లక్ష్మారెడ్డి అక్కడికి చేరుకుని విద్యార్థులకు మద్దతు తెలిపారు. అనంతరం విద్యార్థులు తమ సమస్యలతో కూడిన వినతిపత్రాన్ని ఎమ్మెల్యేకు అందజేశారు.ఈ సందర్భంగా సునీత లక్ష్మారెడ్డి మాట్లాడుతూ పాలిటెక్నిక్ విద్యార్థులకు న్యాయం జరిగేలా ప్రభుత్వం చర్యలు తీసుకోవాలని డిమాండ్ చేశారు. విద్యార్థుల సమస్యలను శాసనసభలో ప్రస్తావించి పరిష్కారానికి కృషి చేస్తానని హామీ ఇచ్చారు. అనంతరం విద్యార్థులు ఆందోళన విరమించి అక్కడి నుంచి వెళ్లిపోయారు.
Admin
ప్రజా పిలుపు
మరిన్ని వార్తలు
Developed By :
