నర్సాపూర్‌లో ఫుడ్ పాయిజన్ కలకలం
వన్ ప్యాలెస్ రెస్టారెంట్‌లో భోజనం చేసిన పలువురికి అస్వస్థత
ప్రజా పిలుపు / తెలంగాణ / మెదక్ : నర్సాపూర్ పట్టణంలోని మెదక్ రోడ్డులో నూతనంగా ప్రారంభించిన వన్ ప్యాలెస్ రెస్టారెంట్‌లో భోజనం చేసిన పలువురు అస్వస్థతకు గురైనట్లు సమాచారం. మంగళవారం రెస్టారెంట్‌లో భోజనం చేసిన ముగ్గురితో పాటు మరికొందరికి అనారోగ్య సమస్యలు తలెత్తడంతో పట్టణంలో ఫుడ్ పాయిజన్ ఘటన కలకలం రేపింది. అస్వస్థతకు గురైన వారిలో కొందరు ప్రైవేట్ ఆసుపత్రుల్లో, మరికొందరు ప్రభుత్వ ఆసుపత్రిలో చికిత్స పొందుతున్నట్లు తెలిసింది. అయితే, బాధితుల సంఖ్య, అస్వస్థతకు గల ఖచ్చితమైన కారణాలపై అధికారికంగా స్పష్టత రావాల్సి ఉంది.ఈ ఘటనతో పట్టణంలోని హోటళ్లు, రెస్టారెంట్లలో ఆహార నాణ్యత, పరిశుభ్రతపై ఆందోళన వ్యక్తమవుతోంది. రెస్టారెంట్‌లో వడ్డించిన ఆహారం వల్లే అస్వస్థతకు గురయ్యారా? ఆహార పదార్థాల నిల్వ, తయారీ విధానాల్లో ఏమైనా లోపాలు ఉన్నాయా? అనే అంశాలపై సంబంధిత అధికారులు విచారణ చేపట్టాల్సిన అవసరం ఉందని పట్టణవాసులు అభిప్రాయపడుతున్నారు.ఫుడ్ సేఫ్టీ అధికారులు వెంటనే స్పందించి రెస్టారెంట్‌లోని ఆహార పదార్థాల నమూనాలను సేకరించి పరీక్షలకు పంపాలని, నాణ్యతా ప్రమాణాల ఉల్లంఘనలు బయటపడితే నిబంధనల ప్రకారం చర్యలు తీసుకోవాలని ప్రజలు కోరుతున్నారు. అలాగే నర్సాపూర్ పట్టణంతో పాటు పరిసర ప్రాంతాల్లోని హోటళ్లు, రెస్టారెంట్లు, ఫాస్ట్‌ఫుడ్ కేంద్రాల్లో విస్తృత తనిఖీలు నిర్వహించి ఆహార భద్రతా ప్రమాణాలు అమలయ్యేలా చూడాలని విజ్ఞప్తి చేస్తున్నారు.ప్రజల ఆరోగ్యంతో ముడిపడిన ఆహార భద్రత విషయంలో అధికారులు నిర్లక్ష్యం వహించకుండా, ఇలాంటి ఘటనలు పునరావృతం కాకుండా ముందస్తు చర్యలు తీసుకోవాలని పట్టణ ప్రజలు డిమాండ్ చేస్తున్నారు.
Admin
ప్రజా పిలుపు
మరిన్ని వార్తలు
Developed By :
