ఓటు హక్కును హరించే కుట్రలను సహించేది లేదు.. ప్రజాస్వామ్య పరిరక్షణకు కాంగ్రెస్ పోరాటం ఆగదు: నీలం మధు
ఢిల్లీ రామ్‌లీలా మైదానంలో ‘ఓట్ బచావో–దేశ్ బచావో’ కార్యక్రమంలో పాల్గొన్న మెదక్ పార్లమెంట్ కాంగ్రెస్ ఇన్‌చార్జి*
ప్రజా పిలుపు / తెలంగాణ / సంగారెడ్డి : * అధికారం కోసం ప్రజాస్వామ్యాన్ని బలిచేయొద్దని, ప్రజల ఓటు హక్కును హరించే కుట్రలను సహించేది లేదని మెదక్ పార్లమెంట్ కాంగ్రెస్ పార్టీ ఇన్‌చార్జి నీలం మధు ముదిరాజ్ స్పష్టం చేశారు. ప్రజాస్వామ్య విలువలను కాపాడేందుకు కాంగ్రెస్ పార్టీ నిరంతరం పోరాటం కొనసాగిస్తుందని పేర్కొన్నారు.ఏఐసీసీ పిలుపు మేరకు నవంబర్ 1న ఢిల్లీలోని రామ్‌లీలా మైదానంలో కాంగ్రెస్ పార్టీ, ఇండియా కూటమి ఆధ్వర్యంలో నిర్వహించిన ‘ఓట్ బచావో–దేశ్ బచావో’ భారీ నిరసన కార్యక్రమంలో నీలం మధు ముదిరాజ్ పాల్గొన్నారు. తెలంగాణ ముఖ్యమంత్రి రేవంత్ రెడ్డి, టీపీసీసీ అధ్యక్షుడు మహేష్ కుమార్ గౌడ్, రాష్ట్ర మంత్రులు, ఎమ్మెల్యేలు, ఇతర కాంగ్రెస్ నాయకులతో కలిసి కేంద్ర ప్రభుత్వ విధానాలకు వ్యతిరేకంగా నిర్వహించిన కార్యక్రమంలో పాల్గొని తన మద్దతు తెలిపారు. అనంతరం తెలంగాణ భవన్‌లో జరిగిన సమావేశాల్లోనూ పాల్గొన్నారు.ఈ సందర్భంగా నీలం మధు మాట్లాడుతూ ప్రజాస్వామ్య విలువలను కాలరాస్తూ, రాజ్యాంగ వ్యవస్థలను రాజకీయ ప్రయోజనాల కోసం ఉపయోగించుకోవాలని కేంద్రంలోని బీజేపీ ప్రభుత్వం ప్రయత్నిస్తోందని విమర్శించారు. ప్రజల ఓటు హక్కును కాపాడాల్సిన బాధ్యతను విస్మరించి, ఎన్నికల వ్యవస్థపై అనుమానాలు తలెత్తే పరిస్థితులకు పాలకులు కారణమవుతున్నారని ఆరోపించారు. ఓటర్ల జాబితాల ప్రత్యేక సమగ్ర సవరణ పేరుతో అర్హులైన ఓటర్ల హక్కులకు ఎలాంటి భంగం కలగకుండా చూడాలని డిమాండ్ చేశారు.ప్రజాస్వామ్యంలో ఓటు అనేది సామాన్యుడికి ఉన్న అత్యంత శక్తివంతమైన ఆయుధమని, ఆ హక్కును కాపాడుకోవడానికి ప్రతి ఒక్కరూ ముందుకు రావాలని పిలుపునిచ్చారు. ప్రజలు తమ పాలకులను ఎన్నుకునే హక్కును ప్రశ్నార్థకం చేసే చర్యలు ప్రజాస్వామ్యానికి ప్రమాదకరమని పేర్కొన్నారు. రాజ్యాంగం కల్పించిన హక్కులను కాపాడాల్సిన కేంద్ర ప్రభుత్వమే వాటిని బలహీనపరిచేలా వ్యవహరిస్తోందని విమర్శించారు.దేశంలోని ప్రజాస్వామ్య సంస్థల స్వతంత్రతను, ఎన్నికల ప్రక్రియ పారదర్శకతను కాపాడాల్సిన అవసరం ఉందన్నారు. ఎన్నికల సంఘం వ్యవహారశైలిపై ప్రతిపక్షాలు లేవనెత్తుతున్న ప్రశ్నలకు కేంద్ర ప్రభుత్వం సమాధానం చెప్పాలని డిమాండ్ చేశారు. ప్రజల గొంతుకను అణచివేయాలని చూస్తే కాంగ్రెస్ పార్టీ మరింత బలంగా పోరాటం సాగిస్తుందని హెచ్చరించారు.రాహుల్ గాంధీ నాయకత్వంలో దేశవ్యాప్తంగా కొనసాగుతున్న ప్రజాస్వామ్య పరిరక్షణ ఉద్యమానికి కాంగ్రెస్ శ్రేణులు, ప్రజలు మద్దతుగా నిలవాలని నీలం మధు ముదిరాజ్ కోరారు. అధికారం శాశ్వతం కాదని, ప్రజాస్వామ్యమే దేశానికి అసలైన బలమని పేర్కొన్నారు. రాజ్యాంగ పరిరక్షణ, ఓటు హక్కు కాపాడటం కోసం కాంగ్రెస్ పార్టీ చేపడుతున్న పోరాటంలో ప్రతి ఒక్కరూ భాగస్వాములు కావాలని పిలుపునిచ్చారు.
Admin
ప్రజా పిలుపు
మరిన్ని వార్తలు
Developed By :
