కరెంటు కోతలతో రోడ్డెక్కిన రైతులు.. రెడ్డిపల్లి వద్ద రాస్తారోకో
ప్రజా పిలుపు / తెలంగాణ / మెదక్ : పంట పొలాలకు సక్రమంగా విద్యుత్ సరఫరా చేయాలని డిమాండ్ చేస్తూ సంగారెడ్డి జిల్లా పరిధిలోని రెడ్డిపల్లి, ఆవంచ గ్రామాల రైతులు శుక్రవారం ఆందోళనకు దిగారు. రెడ్డిపల్లి వద్ద జాతీయ రహదారిపై బైఠాయించి రాస్తారోకో నిర్వహించారు. దీంతో రహదారిపై వాహనాలు భారీగా నిలిచిపోయి ట్రాఫిక్‌కు అంతరాయం ఏర్పడింది.ఈ సందర్భంగా రైతులు మాట్లాడుతూ.. వ్యవసాయానికి అవసరమైన విద్యుత్ సరఫరా సక్రమంగా లేకపోవడంతో తీవ్ర ఇబ్బందులు ఎదుర్కొంటున్నామని ఆవేదన వ్యక్తం చేశారు. రోజుకు కేవలం ఐదు నుంచి ఆరు గంటలు మాత్రమే విద్యుత్ సరఫరా అవుతోందని, దీంతో వరి పంట పొట్ట దశలోనే ఎండిపోయే ప్రమాదం ఏర్పడిందని ఆందోళన వ్యక్తం చేశారు. పంటలు చేతికొచ్చే కీలక సమయంలో విద్యుత్ కోతలు విధించడం వల్ల తీవ్రంగా నష్టపోయే పరిస్థితి నెలకొందని పేర్కొన్నారు.వ్యవసాయానికి రోజుకు 12 గంటల పాటు నిరంతరాయంగా విద్యుత్ సరఫరా చేయాలని రైతులు డిమాండ్ చేశారు. ప్రభుత్వం, విద్యుత్ శాఖ అధికారులు స్పందించి సమస్యను తక్షణమే పరిష్కరించాలని కోరారు.రైతుల ఆందోళన విషయం తెలుసుకున్న విద్యుత్ శాఖ ఏడీ రాఘవేంద్రరావు, పోలీసులు ఘటనా స్థలానికి చేరుకున్నారు. రైతులతో చర్చించి వారి సమస్యలను తెలుసుకున్నారు. విద్యుత్ సరఫరాను క్రమబద్ధీకరిస్తామని అధికారులు హామీ ఇవ్వడంతో రైతులు ఆందోళన విరమించారు. దీంతో రహదారిపై వాహనాల రాకపోకలు తిరిగి సాధారణ స్థితికి చేరుకున్నాయి.
Admin
ప్రజా పిలుపు
మరిన్ని వార్తలు
Developed By :
