మట్టి గణపతిని పూజిద్దాం.. పర్యావరణాన్ని పరిరక్షిద్దాం
పర్యావరణ పరిరక్షణ ప్రతి ఒక్కరి బాధ్యత జిల్లా కలెక్టర్ కె. హైమావతి
ప్రజా పిలుపు / తెలంగాణ / సిద్దిపేట : సిద్దిపేట, సెప్టెంబర్ 7: పర్యావరణ పరిరక్షణ ప్రతి ఒక్కరి బాధ్యత అని, పర్యావరణాన్ని కాపాడేందుకు తీసుకోవాల్సిన చర్యలపై ప్రజల్లో విస్తృత అవగాహన కల్పించాల్సిన అవసరం ఉందని సిద్దిపేట జిల్లా కలెక్టర్ కె. హైమావతి అన్నారు.సోమవారం సమీకృత జిల్లా కార్యాలయ సముదాయంలోని సమావేశ మందిరంలో తెలంగాణ కాలుష్య నియంత్రణ మండలి ఆధ్వర్యంలో పర్యావరణ పరిరక్షణకు సంబంధించిన పోస్టర్‌ను జిల్లా కలెక్టర్ కె. హైమావతి ఆవిష్కరించారు. ఈ సందర్భంగా ఆమె మాట్లాడుతూ వినాయక చవితి సందర్భంగా ప్లాస్టర్ ఆఫ్ పారిస్‌తో తయారు చేసిన విగ్రహాలను వినియోగించడం వల్ల చెరువులు, కాలువలు, ఇతర నీటి వనరులు కలుషితమయ్యే ప్రమాదం ఉందన్నారు. పర్యావరణ పరిరక్షణలో భాగంగా మట్టి గణపతులను పూజించాలని ప్రజలకు సూచించారు.మట్టి గణపతుల వినియోగంతో నీటి వనరులను కాలుష్యం నుంచి కాపాడటంతో పాటు పర్యావరణ పరిరక్షణకు ప్రతి ఒక్కరూ తమ వంతు సహకారం అందించాలని కలెక్టర్ కోరారు. అదే విధంగా ప్లాస్టిక్ కాలుష్యాన్ని తగ్గించేందుకు ప్రజలు చొరవ చూపాలని, ప్లాస్టిక్ వినియోగాన్ని సాధ్యమైనంత వరకు తగ్గించి పర్యావరణహిత ప్రత్యామ్నాయాలను వినియోగించాలని సూచించారు.ప్రస్తుత కాలంలో పర్యావరణ కాలుష్యం పెరుగుతున్న నేపథ్యంలో గాలి, నీరు, నేల కాలుష్యాన్ని నియంత్రించడం అత్యంత అవసరమని కలెక్టర్ పేర్కొన్నారు. పర్యావరణ పరిరక్షణపై ప్రతి ఒక్కరిలో బాధ్యత, అవగాహన పెంపొందినప్పుడే భావితరాలకు స్వచ్ఛమైన గాలి, పరిశుభ్రమైన నీరు, ఆరోగ్యకరమైన నేలను అందించగలమని ఆమె తెలిపారు. పర్యావరణ పరిరక్షణను కేవలం ప్రభుత్వ బాధ్యతగా భావించకుండా ప్రతి పౌరుడు సామాజిక బాధ్యతగా స్వీకరించాలని కలెక్టర్ పిలుపునిచ్చారు.ఈ కార్యక్రమంలో జిల్లా రెవెన్యూ అధికారి నాగరాజమ్మ, ఎస్‌డీసీ సుదర్శన్ రెడ్డి, ఆర్‌సీ పురం కాలుష్య నియంత్రణ మండలి అధికారి టి. రవీందర్, ఏఓ రాజ్‌కుమార్, సహాయ పర్యావరణ శాస్త్రవేత్తలు, కాలుష్య నియంత్రణ మండలి ప్రాంతీయ కార్యాలయం ఆర్‌సీ పురం సిబ్బంది తదితరులు పాల్గొన్నారు.
Admin
ప్రజా పిలుపు
మరిన్ని వార్తలు
Developed By :
