విద్యార్థులకు చట్టాలపై అవగాహన అవసరం
బీరంగూడ జడ్పీహెచ్‌ఎస్ పాఠశాలలో న్యాయ విజ్ఞాన సదస్సు
ప్రజా పిలుపు / తెలంగాణ / సంగారెడ్డి : విద్యార్థులు చిన్న వయస్సు నుంచే చట్టాలు, రాజ్యాంగ హక్కులపై అవగాహన కలిగి ఉండాలని సంగారెడ్డి జిల్లా సీనియర్ సివిల్ జడ్జి, జిల్లా న్యాయ సేవాధికార సంస్థ కార్యదర్శి బి. సౌజన్య సూచించారు. హైకోర్టు అడ్వకేట్ ఐలాపూర్ మాణిక్ యాదవ్ ఆధ్వర్యంలో శనివారం బీరంగూడ జడ్పీహెచ్‌ఎస్ పాఠశాలలో విద్యార్థులకు చట్టపరమైన అవగాహన సదస్సు నిర్వహించారు. ఈ కార్యక్రమానికి బి. సౌజన్య ముఖ్య అతిథిగా హాజరై విద్యార్థులకు పలు చట్టాలు, సామాజిక అంశాలపై అవగాహన కల్పించారు.ఈ సందర్భంగా రాజ్యాంగం కల్పించిన ప్రాథమిక హక్కులు, బాలల రక్షణ చట్టం (పోక్సో), సైబర్ నేరాలు, మొబైల్ ఫోన్ల వినియోగంలో తీసుకోవాల్సిన జాగ్రత్తలు, బాలికల భద్రత, మాదకద్రవ్యాల దుష్ప్రభావాలు, వ్యక్తిగత పరిశుభ్రత, పర్యావరణ పరిరక్షణ, పౌర బాధ్యతల గురించి వివరించారు. ముఖ్యంగా సైబర్ నేరాల పట్ల అప్రమత్తంగా ఉండాలని, అపరిచిత వ్యక్తుల ఫోన్ కాల్స్, సందేశాలు, అనుమానాస్పద లింకుల పట్ల జాగ్రత్త వహించాలని సూచించారు.విద్యార్థులు తమ హక్కులను తెలుసుకోవడంతో పాటు ఇతరుల హక్కులను గౌరవించాలని, ఎలాంటి అన్యాయం జరిగినా భయపడకుండా సంబంధిత అధికారులను ఆశ్రయించాలని తెలిపారు. బాలలపై జరిగే నేరాల విషయంలో అవగాహన కలిగి ఉండాలని, మంచి అలవాట్లు అలవరుచుకుని సమాజానికి ఉపయోగపడే బాధ్యతాయుతమైన పౌరులుగా ఎదగాలని సూచించారు.పుస్తక జ్ఞానంతో పాటు చట్టాలపై అవగాహన, సామాజిక స్పృహ, పౌర బాధ్యతలను విద్యార్థుల్లో పెంపొందించడమే ఇటువంటి కార్యక్రమాల ప్రధాన ఉద్దేశమని నిర్వాహకులు పేర్కొన్నారు. ఈ కార్యక్రమంలో పోలీస్ సబ్‌ఇన్‌స్పెక్టర్ విజయ్, పాఠశాల ప్రధానోపాధ్యాయులు, ఉపాధ్యాయులు, విద్యార్థులు తదితరులు పాల్గొన్నారు.
Admin
ప్రజా పిలుపు
మరిన్ని వార్తలు
Developed By :
