ఈదుల నాగులపల్లిలో ర.25 లక్షలతో నిర్మించిన ఎస్సీ కమ్యూనిటీ హాల్ ప్రారంభం
అభివృద్ధి పనులకు ఎమ్మెల్యే గూడెం మహిపాల్ రెడ్డి రూ.3 లక్షల విరాళం
ప్రజా పిలుపు / తెలంగాణ / సంగారెడ్డి : నియోజకవర్గంలోని అన్ని వర్గాల ప్రజల సంక్షేమం, సమగ్ర అభివృద్ధికి ప్రాధాన్యతనిస్తూ ముందుకు సాగుతున్నామని పటాన్చెరు ఎమ్మెల్యే గూడెం మహిపాల్ రెడ్డి అన్నారు. అర్హులైన ప్రతి ఒక్కరికీ ప్రభుత్వ సంక్షేమ పథకాల ప్రయోజనాలు అందేలా కృషి చేస్తున్నామని తెలిపారు.తెల్లాపూర్ డివిజన్ పరిధిలోని ఈదుల నాగులపల్లి గ్రామంలో రూ.25 లక్షల అంచనా వ్యయంతో నిర్మించిన ఎస్సీ కమ్యూనిటీ హాల్‌ను మంగళవారం ఎమ్మెల్యే గూడెం మహిపాల్ రెడ్డి ప్రారంభించారు. ఈ సందర్భంగా ఆయన మాట్లాడుతూ గ్రామీణ ప్రాంతాల్లో ప్రజల అవసరాలకు అనుగుణంగా మౌలిక వసతులను కల్పించేందుకు ప్రత్యేక శ్రద్ధ చూపుతున్నామని తెలిపారు.ఈదుల నాగులపల్లిలో నిర్మించిన కమ్యూనిటీ హాల్‌కు మరింత అభివృద్ధి, అవసరమైన సౌకర్యాల కల్పన కోసం తన సొంత నిధుల నుంచి రూ.3 లక్షలు అందించినట్లు ఎమ్మెల్యే వెల్లడించారు. ప్రజలకు ఉపయోగపడే సామాజిక వేదికలను అందుబాటులోకి తీసుకురావడం ద్వారా గ్రామాల్లో సామాజిక కార్యక్రమాలకు సౌకర్యం కలుగుతుందని అన్నారు.నియోజకవర్గంలోని అన్ని ప్రాంతాల్లో మౌలిక వసతులను దశలవారీగా అభివృద్ధి చేస్తామని గూడెం మహిపాల్ రెడ్డి తెలిపారు. కుల, వర్గ భేదాలకు అతీతంగా ప్రతి ఒక్కరికీ సమాన ప్రాధాన్యతనిస్తూ పటాన్చెరు నియోజకవర్గాన్ని అభివృద్ధి పథంలో ముందుకు తీసుకెళ్తామని పేర్కొన్నారు.కార్యక్రమంలో తెల్లాపూర్ మున్సిపల్ మాజీ ఉపాధ్యక్షుడు రాములు గౌడ్, డీఈ కృష్ణవేణి, ఏఈ ఫైజాన్, బీఆర్ఎస్ పార్టీ డివిజన్ అధ్యక్షుడు దేవేందర్ యాదవ్, మాజీ ప్రజాప్రతినిధులు రవీందర్ రెడ్డి, కొమరయ్య, శ్రీకాంత్, నాగరాజు, శ్రీశైలం, నాయకులు రమేష్, చెన్నారెడ్డి, సాయి చరణ్ గౌడ్, కమిటీ సభ్యులు, గ్రామస్తులు తదితరులు పాల్గొన్నారు.
Admin
ప్రజా పిలుపు
మరిన్ని వార్తలు
Developed By :
