సంగారెడ్డి జిల్లా వ్యాప్తంగా 3వ జాతీయ లోక్అదాలత్
సెప్టెంబర్ 12న ఐదు కోర్టు ప్రాంగణాల్లో నిర్వహణ
ప్రజా పిలుపు / తెలంగాణ / సంగారెడ్డి : సంగారెడ్డి, సెప్టెంబర్ 9: సంగారెడ్డి జిల్లా న్యాయ సేవాధికార సంస్థ ఆధ్వర్యంలో 3వ జాతీయ లోక్‌అదాలత్‌ను ఈ నెల 12న సంగారెడ్డి జిల్లా కోర్టుతో పాటు జహీరాబాద్, జోగిపేట, నారాయణఖేడ్, జిన్నారం కోర్టు ప్రాంగణాల్లో నిర్వహించనున్నట్లు సంగారెడ్డి జిల్లా ప్రధాన న్యాయమూర్తి, సెషన్స్ జడ్జి, జిల్లా న్యాయ సేవాధికార సంస్థ చైర్‌పర్సన్ శ్రీమతి జి. భవానీ చంద్ర తెలిపారు.జాతీయ లోక్అదాలత్ ద్వారా వివిధ రకాల సివిల్, క్రిమినల్, చెక్ బౌన్స్, మోటారు వాహన ప్రమాద పరిహార కేసులు, కుటుంబ వివాదాలు, బ్యాంకింగ్ తదితర రాజీ పడదగిన కేసులను ఇరుపక్షాల పరస్పర అంగీకారంతో త్వరితగతిన పరిష్కరించుకునే అవకాశం ఉంటుందని ఆమె తెలిపారు.లోక్అదాలత్ ద్వారా కేసులు పరిష్కరించుకోవడం వల్ల సమయం, ఖర్చు ఆదా కావడంతో పాటు ఇరుపక్షాల మధ్య సుహృద్భావ వాతావరణం ఏర్పడుతుందని పేర్కొన్నారు. అలాగే కోర్టుల్లో పెండింగ్‌లో ఉన్న కేసుల సంఖ్యను తగ్గించేందుకు లోక్‌అదాలత్‌లు ఎంతగానో దోహదపడతాయని తెలిపారు.సెప్టెంబర్ 12న నిర్వహించనున్న జాతీయ లోక్‌అదాలత్‌లో అత్యధిక సంఖ్యలో కేసులను పరిష్కరించేలా చర్యలు చేపట్టాలని న్యాయాధికారులు, న్యాయవాదులు, పోలీసు అధికారులు, సంబంధిత శాఖల అధికారులను ఆమె కోరారు. కోర్టుల్లో పెండింగ్‌లో ఉన్న కేసులతో పాటు ప్రీ-లిటిగేషన్ దశలో ఉన్న వివాదాలను కూడా పరస్పర అంగీకారంతో పరిష్కరించుకునేందుకు ప్రజలు ఈ అవకాశాన్ని సద్వినియోగం చేసుకోవాలని సూచించారు.ప్రజలు తమ కేసుల పరిష్కారం కోసం సంబంధిత కోర్టు జిల్లా న్యాయ సేవాధికార సంస్థ లేదా తాలూకా న్యాయ సేవా కమిటీని సంప్రదించి, లోక్అదాలత్ ద్వారా కేసులను పరిష్కరించుకునేందుకు ముందుకు రావాలని జి. భవానీ చంద్ర పిలుపునిచ్చారు.రాజీ మార్గమే ఉత్తమ మార్గం – లోక్అదాలత్ ద్వారా త్వరితగతిన న్యాయం” అనే లక్ష్యంతో నిర్వహిస్తున్న 3వ జాతీయ లోక్‌అదాలత్‌ను విజయవంతం చేయడానికి అన్ని వర్గాలు సహకరించాలని ఆమె కోరారు.
Admin
ప్రజా పిలుపు
మరిన్ని వార్తలు
Developed By :
