అనంతగిరి బస్సు ప్రమాదంపై ఎమ్మెల్యే జిఎంఆర్ దిగ్భ్రాంతి
మృతుల కుటుంబాలకు రూ.25 లక్షలు, క్షతగాత్రులకు రూ.10 లక్షల పరిహారం ఇవ్వాలని డిమాండ్
ప్రజా పిలుపు / తెలంగాణ / సంగారెడ్డి : పటాన్చెరు: వికారాబాద్ జిల్లా అనంతగిరి ఘాట్ రోడ్డులో ప్రైవేటు బస్సు అదుపుతప్పి బోల్తాపడిన ఘటనపై పటాన్చెరు ఎమ్మెల్యే గూడెం మహిపాల్ రెడ్డి (జిఎంఆర్) తీవ్ర విచారం వ్యక్తం చేశారు. ప్రమాద సమాచారం అందిన వెంటనే ఘటనాస్థలికి వెళ్లి పరిస్థితులను పరిశీలించారు. అనంతరం వికారాబాద్ ప్రభుత్వ ఆసుపత్రికి చేరుకుని క్షతగాత్రులను పరామర్శించారు.ప్రమాదంలో మృతులు, క్షతగాత్రులంతా సంగారెడ్డి జిల్లా పటాన్చెరు నియోజకవర్గం, పటాన్చెరు మండలం క్యాసారం గ్రామానికి చెందిన వారేనని తెలిపారు. బంధువుల అంత్యక్రియలకు వెళ్తున్న సమయంలో ఈ ప్రమాదం చోటుచేసుకోవడం తీవ్ర విషాదకరమన్నారు.క్షతగాత్రులకు మెరుగైన వైద్యం అందించాలని అధికారులను ఎమ్మెల్యే ఆదేశించారు. అవసరమైన వారిని వెంటనే కార్పొరేట్ ఆసుపత్రులకు తరలించి మెరుగైన చికిత్స అందించాలని సూచించారు. మృతుల కుటుంబాలను పరామర్శించి ప్రగాఢ సానుభూతి తెలిపారు.ఈ సందర్భంగా జిఎంఆర్ మాట్లాడుతూ.. ప్రమాద ఘటన తనను తీవ్ర దిగ్భ్రాంతికి గురిచేసిందన్నారు. ప్రైవేటు బస్సు డ్రైవర్ నిర్లక్ష్యమే ప్రమాదానికి కారణమైందని ఆరోపిస్తూ, ఘటనపై సమగ్ర విచారణ జరిపి బాధ్యులపై క్రిమినల్ కేసులు నమోదు చేయాలని డిమాండ్ చేశారు.మృతుల కుటుంబాలకు రూ.25 లక్షలు, క్షతగాత్రులకు రూ.10 లక్షల చొప్పున నష్టపరిహారం అందించాలని రాష్ట్ర ప్రభుత్వాన్ని కోరారు. కేంద్ర ప్రభుత్వం కూడా బాధిత కుటుంబాలకు అండగా నిలవాలని విజ్ఞప్తి చేశారు. ఒకే గ్రామానికి చెందిన ఐదుగురు మృతి చెందడం పట్ల తీవ్ర ఆవేదన వ్యక్తం చేసిన ఎమ్మెల్యే, బాధిత కుటుంబాలకు అన్ని విధాలా అండగా ఉంటామని భరోసా ఇచ్చారు.
Admin
ప్రజా పిలుపు
మరిన్ని వార్తలు
Developed By :
