పటాన్చెరులో దోపిడీ, దాడి కేసు.. ఐదుగురి ప్రమేయం
బంగారు గొలుసు, మొబైల్ ఫోన్, పర్సు స్వాధీనం.. ముగ్గురు వయోజనులు, ఇద్దరు బాలలు నిందితులు
ప్రజా పిలుపు / తెలంగాణ / సంగారెడ్డి : పటాన్చెరు: సైబరాబాద్ పోలీస్ కమిషనరేట్ పరిధిలోని పటాన్చెరు పోలీస్ స్టేషన్ పరిధిలో జరిగిన దోపిడీ, దాడి ఘటనలో ఐదుగురి ప్రమేయం ఉన్నట్లు పోలీసులు గుర్తించారు. ఈ కేసులో ముగ్గురు వయోజనులతో పాటు ఇద్దరు బాలలు ఉన్నట్లు వెల్లడించారు. నిందితుల నుంచి సుమారు 10 గ్రాముల బంగారు గొలుసు, రెడ్మి మొబైల్ ఫోన్, నల్లరంగు పర్సును స్వాధీనం చేసుకున్నట్లు పోలీసులు తెలిపారు.పోలీసులు వెల్లడించిన వివరాల ప్రకారం.. ఈ నెల 25వ తేదీన సాయంత్రం సుమారు 4.30 గంటల సమయంలో ఫిర్యాదుదారుడు సైకత్ రాయ్, అతని పరిచయస్తుడు షేక్ హనీఫ్ బాషా ఇంద్రేశం గ్రామంలోని త్రిశూల్ వైన్స్ సమీపంలో కూర్చుని ఉన్నారు. ఆ సమయంలో అక్కడికి వచ్చిన ఐదుగురు వ్యక్తులు వారితో గొడవకు దిగారు. అనంతరం ప్లాస్టిక్ పైపుతో దాడి చేసి, బెదిరింపులకు పాల్పడి వారి వద్ద ఉన్న బంగారు గొలుసు, మొబైల్ ఫోన్, పర్సును బలవంతంగా లాక్కున్నట్లు ఫిర్యాదులో పేర్కొన్నారు.అంతటితో ఆగకుండా నిందితులు బాధితుడితో బలవంతంగా ఆన్‌లైన్‌లో డబ్బులు చెల్లింపజేసి బీరు, పెట్రోల్ కొనుగోలు చేయించినట్లు పోలీసులు తెలిపారు. అనంతరం బాధితులను సుల్తాన్‌పూర్ వైపు తీసుకెళ్లి నిర్మానుష్య ప్రాంతంలో మరోసారి దాడి చేసినట్లు వెల్లడించారు. ఈ ఘటనలో షేక్ హనీఫ్ బాషా తలపై బీరు సీసాతో గాయపరిచినట్లు పేర్కొన్నారు.తర్వాత బాధితులను ముత్తంగి సమీపంలోని ప్యాలెస్-2 రెస్టారెంట్ వద్దకు తీసుకువచ్చారు. అక్కడ ఫిర్యాదుదారుడు సహాయం కోసం కేకలు వేయడంతో నిందితులు అక్కడి నుంచి పరారైనట్లు పోలీసులు తెలిపారు.ఈ ఘటనపై పటాన్చెరు పోలీస్ స్టేషన్‌లో క్రైమ్ నంబర్ 1418/2026గా కేసు నమోదైంది. దర్యాప్తులో భాగంగా ఈ నెల 28వ తేదీన నిందితులను గుర్తించి, వారి వద్ద నుంచి చోరీకి గురైన వస్తువులను స్వాధీనం చేసుకున్నట్లు పోలీసులు వెల్లడించారు.ఈ కేసులో షేక్ జహంగీర్ (35), మ్యాదరి ఆనంద్ (25), ఉమర్ ఫారూఖ్ (18)తో పాటు మరో ఇద్దరు బాలల ప్రమేయం ఉన్నట్లు పోలీసులు పేర్కొన్నారు. షేక్ జహంగీర్ పటాన్చెరు ముదిరాజ్ బస్తీలో నివసిస్తూ ప్రైవేట్ ఉద్యోగం చేస్తున్నాడు. మ్యాదరి ఆనంద్ ఇందేశం గ్రామంలోని సాయి కాలనీలో నివసిస్తూ కూరగాయల వ్యాపారం చేస్తున్నాడు. ఉమర్ ఫారూఖ్ కిష్టారెడ్డిపేట గ్రామానికి చెందినవాడు కాగా, ఎలక్ట్రిషియన్‌గా పనిచేస్తున్నాడు.ఈ ఘటనకు సంబంధించి తదుపరి దర్యాప్తు కొనసాగుతోందని పటాన్చెరు పోలీసులు తెలిపారు.
Admin
ప్రజా పిలుపు
మరిన్ని వార్తలు
Developed By :
