మదర్ థెరిసా ‘సేవారత్న’ పురస్కారాల ప్రదానం
ప్రజా పిలుపు / తెలంగాణ / హైద్రాబాద్ : ఫ్రెండ్స్ వెల్ఫేర్ అసోసియేషన్ ఆధ్వర్యంలో బుధవారం మాదాపూర్లోని స్వాతి హైస్కూల్లో నోబెల్ శాంతి బహుమతి గ్రహీత మదర్ థెరిసా జయంతి వేడుకలను ఘనంగా నిర్వహించారు. అసోసియేషన్ కన్వీనర్ తాడిబోయిన రామస్వామి యాదవ్ అధ్యక్షతన జరిగిన ఈ కార్యక్రమంలో ముందుగా మదర్ థెరిసా చిత్రపటానికి పూలమాలలు వేసి, కొవ్వొత్తులు వెలిగించి ఘనంగా నివాళులర్పించారు.కార్యక్రమానికి హెచ్సీయూ తెలుగు శాఖ పూర్వ అధ్యక్షులు ఆచార్య దార్ల వెంకటేశ్వరరావు ముఖ్య అతిథిగా, రాగం మల్లికార్జున యాదవ్ గౌరవ అతిథిగా హాజరయ్యారు. ఈ సందర్భంగా ఆచార్య దార్ల వెంకటేశ్వరరావు మాట్లాడుతూ మదర్ థెరిసా జీవితంలోని స్ఫూర్తిదాయకమైన అంశాలను వివరించారు. పేదలు, అనాథలు, రోగుల సేవకు తన జీవితాన్ని అంకితం చేసిన గొప్ప మానవతావాది మదర్ థెరిసా అని కొనియాడారు. ‘మానవ సేవే మాధవ సేవ’ అనే సూత్రంతో సమాజంలో అట్టడుగున ఉన్న వారి కోసం ఆమె ఎనలేని కృషి చేశారని తెలిపారు. 1950లో కేవలం 13 మంది సభ్యులతో ప్రారంభమైన ‘మిషనరీస్ ఆఫ్ చారిటీ’ సేవా కార్యక్రమాలు ప్రపంచవ్యాప్తంగా విస్తరించాయని గుర్తుచేశారు. మరణశయ్యపై ఉన్న నిరుపేదలు, అనాథలకు ఆశ్రయం కల్పించేందుకు కలకత్తాలోని కాళీఘాట్లో ఏర్పాటు చేసిన ‘నిర్మల్ హృదయ్’, అనాథ పిల్లల కోసం ఏర్పాటు చేసిన ‘శిశు భవన్’ వంటి సంస్థలు మానవత్వానికి నిలువెత్తు నిదర్శనాలని పేర్కొన్నారు.అసోసియేషన్ కన్వీనర్ తాడిబోయిన రామస్వామి యాదవ్ మాట్లాడుతూ సమాజంలో ‘మానవ సేవే మాధవ సేవ’గా భావించి వివిధ రంగాల్లో అంకితభావంతో సేవలందిస్తున్న వారిని ప్రోత్సహించేందుకు ‘సేవారత్న’ పురస్కారాలను అందిస్తున్నామని తెలిపారు.స్వాతి హైస్కూల్ ప్రిన్సిపాల్ చంద్రిక మాట్లాడుతూ మదర్ థెరిసా భౌతికంగా మన మధ్య లేకపోయినా, ఆమె స్థాపించిన సంస్థల ద్వారా దయ, కరుణ, సేవాభావం నేటికీ కోట్లాది మందికి స్ఫూర్తినిస్తూనే ఉన్నాయని అన్నారు.ఈ సందర్భంగా వివిధ రంగాల్లో విశేష సేవలందించిన శ్రీమతి ఎం. అరుణ, శ్రీ ఎం. వెంకటరావు, డాక్టర్ కె. అరుణశ్రీ, డాక్టర్ రాజ్ కుమార్ లట్టుపల్లి (జాయ్ ఫౌండేషన్), శ్రీ జి.ఎస్.డి. గుప్తా (షిరిడీ సాయిబాబా అసోసియేషన్, రిటైర్డ్ బీహెచ్ఈఎల్ ఏజీఎం)లకు అతిథుల చేతుల మీదుగా దుశ్శాలువ, జ్ఞాపిక, పగిడి, తాంబూలంతో ‘సేవారత్న’ పురస్కారాలను అందజేశారు.పురస్కార గ్రహీతలు తమ సేవలకు తగిన గుర్తింపు లభించడం పట్ల ఆనందం వ్యక్తం చేస్తూ, ఈ ప్రోత్సాహంతో మరింత మందికి స్ఫూర్తినిచ్చేలా సేవా కార్యక్రమాలు కొనసాగిస్తామని తెలిపారు.కార్యక్రమంలో స్వాతి హైస్కూల్ ప్రిన్సిపాల్ చంద్రిక, కొత్తపల్లి కోటేశ్వరరావు, డాక్టర్ రామన్న, డి.వి.కె.రావు, సుబ్బారావు, వాణీ సాంబశివరావు, విష్ణు ప్రసాద్, పాలం శీను, శివరాం రెడ్డి, బాలన్న, డాక్టర్ సాంబశివరావు, తెలుగు శాంతికుమార్, డాక్టర్ లతాగుప్త, సత్యనారాయణ, విద్యార్థులు తదితరులు పాల్గొన్నారు.
Admin
ప్రజా పిలుపు
మరిన్ని వార్తలు
Developed By :
