మైనర్ బాలిక అపహరణకు యత్నం.. తల్లిదండ్రులపై దాడి*
ముగ్గురు నిందితులను అరెస్ట్ చేసిన పటాన్చెరు పోలీసులు*
ప్రజా పిలుపు / తెలంగాణ / సంగారెడ్డి : మైనర్ బాలికను బలవంతంగా తీసుకెళ్లి వివాహం చేసుకోవాలనే ఉద్దేశంతో ఆమె తల్లిదండ్రులపై దాడికి పాల్పడిన ముగ్గురు నిందితులను పటాన్చెరు పోలీసులు అరెస్ట్ చేశారు.ఇంద్రేశంలో చోటుచేసుకున్న ఈ ఘటనపై కేసు నమోదు చేసి దర్యాప్తు కొనసాగిస్తున్నారు.పటాన్ చేరు పోలీసుల వివరాల ప్రకారం.. ఇంద్రేశంలో నివసించే మైనర్ బాలికతో మహమ్మద్ అలీం పాషా (24) పరిచయం పెంచుకున్నాడు. బాలిక తల్లిదండ్రుల అనుమతి లేకుండా ఆమెను తన ఇంటికి తీసుకెళ్లి గతంలో లైంగిక దాడికి పాల్పడినట్లు విచారణలో వెల్లడైంది. బాలిక తల్లిదండ్రులు వివాహానికి అంగీకరించకపోవడంతో వారిని బెదిరించి బాలికను అపహరించేందుకు తన స్నేహితులైన వడ్డే రాజేష్ అలియాస్ శివరాత్రి రాజేష్, ముద్దం రాజుతో కలిసి కుట్ర పన్నినట్లు పోలీసులు తెలిపారు.ఆగస్టు 30వ తేదీ రాత్రి సుమారు 11 గంటల సమయంలో ముగ్గురు కలిసి బాలికను అపహరించాలని, తల్లిదండ్రులు అడ్డుకుంటే వారిపై దాడి చేయాలని నిర్ణయించుకున్నారు. అనంతరం అర్ధరాత్రి 12.30 గంటల సమయంలో కట్టె, మద్యం సీసాలతో బాలిక కుటుంబం నివసిస్తున్న గుడిసె వద్దకు వెళ్లారు.మహమ్మద్ అలీం పాషా, వడ్డే రాజేష్‌లు బాలిక తండ్రిని గుడిసె నుంచి బయటకు లాగి తీసుకువచ్చి దాడి చేశారు. అలీం పాషా కట్టెతో అతడి చేతులు, కాళ్లపై కొట్టగా.. రాజేష్ మద్యం సీసాతో దాడి చేశాడు. అడ్డుకునేందుకు ప్రయత్నించిన బాలిక తల్లిపై అలీం పాషా రాయితో ముఖంపై దాడి చేశాడు. ముద్దం రాజు కూడా మద్యం సీసాతో బాలిక తండ్రిపై దాడి చేసినట్లు పోలీసులు తెలిపారు. అడ్డుగా వచ్చిన బాలిక సోదరిని అలీం పాషా కొట్టి నెట్టివేశాడు.దాడి అనంతరం అలీం పాషా బాలికను బలవంతంగా తన వెంట తీసుకెళ్లాడు. పోలీసులు వస్తున్నట్లు గమనించి ఇంటి వెనుక వైపు నుంచి పరారయ్యాడు. అయితే సెప్టెంబర్ 1వ తేదీ ఉదయం సుమారు 11 గంటలకు తన ఇంటికి తిరిగి వచ్చిన సమయంలో పటాన్చెరు పోలీసులు అతడిని అదుపులోకి తీసుకున్నారు.అనంతరం రాజేష్, ముద్దం రాజులను కూడా అదుపులోకి తీసుకుని విచారించగా, నేరంలో తమ పాత్రను అంగీకరించినట్లు పోలీసులు తెలిపారు.ఈ ఘటనపై భారతీయ న్యాయ సంహితలోని 331(6), 109, 137(2), 3(5) సెక్షన్లతో పాటు బాలలపై లైంగిక నేరాల నిరోధక చట్టంలోని 5,6 సెక్షన్ల కింద కేసు నమోదు చేసి దర్యాప్తు కొనసాగిస్తున్నారు. ముగ్గురు నిందితుల గత నేర చరిత్రను కూడా పోలీసులు పరిశీలిస్తున్నారు.మైనర్ బాలికలు, మహిళల భద్రత విషయంలో పోలీసు శాఖ అత్యంత కఠినంగా వ్యవహరిస్తుందని పోలీసులు తెలిపారు. చట్టాన్ని ఉల్లంఘించే వారిపై కఠినమైన చట్టపరమైన చర్యలు తీసుకుంటామని స్పష్టం చేశారు.
Admin
ప్రజా పిలుపు
మరిన్ని వార్తలు
Developed By :
