420 హామీలపై ప్రజలకు సమాధానం చెప్పాలి: బీఆర్ఎస్ నాయకులు మాద్రి పృథ్వీరాజ్
ప్రజా పిలుపు / తెలంగాణ / సంగారెడ్డి : పటాన్చెరు: ఎన్నికల సమయంలో ప్రజలకు ఇచ్చిన 420 హామీలను తక్షణమే అమలు చేసి, వాటిపై ప్రజలకు ప్రభుత్వం సమాధానం చెప్పాలని బీఆర్ఎస్ నాయకులు, ఎండీఆర్ ఫౌండేషన్ సహ వ్యవస్థాపకుడు మాద్రి పృథ్వీరాజ్ డిమాండ్ చేశారు.బీఆర్ఎస్ అధినేత, తెలంగాణ తొలి ముఖ్యమంత్రి కల్వకుంట్ల చంద్రశేఖర్‌రావు సూచనల మేరకు, బీఆర్ఎస్ వర్కింగ్ ప్రెసిడెంట్ కేటీఆర్, శాసనసభ ఉపనేత తన్నీరు హరీశ్‌రావు ఆదేశాలతో, పటాన్చెరు ఎమ్మెల్యే గూడెం మహిపాల్‌రెడ్డి నేతృత్వంలో చేపట్టిన వారం రోజుల పోరుబాటలో భాగంగా పటాన్చెరులో తొలిరోజు నిరసన కార్యక్రమం నిర్వహించారు.ఈ సందర్భంగా పటాన్చెరు పట్టణంలోని ఎంజీ రోడ్డు నుంచి అంబేద్కర్ విగ్రహం వరకు 420 హామీలతో కూడిన ఫ్లెక్సీలను ప్రదర్శిస్తూ నిరసన ర్యాలీ నిర్వహించారు. అనంతరం ప్రభుత్వం అమలు చేయాల్సిన హామీలను వివరిస్తూ ప్రజలకు ‘బాకీ హామీల కార్డులు’ పంపిణీ చేశారు.కార్యక్రమంలో ఎమ్మెల్యే గూడెం మహిపాల్‌రెడ్డి, నియోజకవర్గ ఇన్‌చార్జి ఆదర్శ్‌రెడ్డితో పాటు బీఆర్ఎస్ నాయకులు, ఎండీఆర్ ఫౌండేషన్ సహ వ్యవస్థాపకుడు మాద్రి పృథ్వీరాజ్ పాల్గొన్నారు.ఈ సందర్భంగా పృథ్వీరాజ్ మాట్లాడుతూ.. ఎన్నికల సమయంలో 420 హామీలు ఇచ్చి ప్రజలకు ఎన్నో ఆశలు కల్పించి అధికారంలోకి వచ్చిన కాంగ్రెస్ ప్రభుత్వం, వెయ్యి రోజులు దాటినా హామీలను పూర్తిస్థాయిలో అమలు చేయడంలో విఫలమైందని విమర్శించారు. వంద రోజుల్లో హామీలను అమలు చేస్తామని ప్రకటించిన ప్రభుత్వం, ఇంతకాలం గడిచినా వాటి అమలుపై ప్రజలకు స్పష్టమైన సమాధానం ఇవ్వడం లేదని అన్నారు.రైతులు, మహిళలు, యువత, విద్యార్థులు, పేదలు, సామాన్య ప్రజలకు ఇచ్చిన హామీలను తక్షణమే అమలు చేయాలని డిమాండ్ చేశారు. గత బీఆర్ఎస్ ప్రభుత్వం అమలు చేసిన కల్యాణలక్ష్మి, షాదీ ముబారక్, కేసీఆర్ కిట్ వంటి సంక్షేమ పథకాలపై కూడా ప్రభుత్వం స్పష్టత ఇవ్వాలని కోరారు.పటాన్చెరు నియోజకవర్గంలోని ప్రతి గ్రామం, ప్రతి వార్డు, ప్రతి డివిజన్‌లో ప్రజా సమస్యలు, హామీల అమలుపై బీఆర్ఎస్ పోరాటాన్ని మరింత విస్తృతం చేస్తుందని పృథ్వీరాజ్ తెలిపారు.ప్రజల తరఫున ప్రశ్నిస్తాం.. ప్రజల కోసం పోరాడతాం. ప్రజలకు ఇచ్చిన హామీలు అమలు చేసే వరకు బీఆర్ఎస్ పోరాటం కొనసాగుతుంది” అని ఆయన స్పష్టం చేశారు.ఈ కార్యక్రమంలో మాజీ కార్పొరేటర్లు, మున్సిపల్ చైర్మన్, మాజీ చైర్మన్, మాజీ ప్రజాప్రతినిధులు, బీఆర్ఎస్ నాయకులు, మహిళా నాయకులు, ఎంఆర్‌ఆర్ యువసేన సభ్యులు, కార్యకర్తలు, పార్టీ శ్రేణులు, అభిమానులు తదితరులు పాల్గొన్నారు.
Admin
ప్రజా పిలుపు
మరిన్ని వార్తలు
Developed By :
