సౌత్ జోన్ స్టేట్ బాక్సింగ్ ఛాంపియన్‌షిప్‌లో సత్తా చాటిన పటాన్చెరు యువకుడు
బచ్చు హేమంత్ ముదిరాజ్‌కు స్వర్ణ పతకం.. జాతీయ స్థాయి పోటీలకు ఎంపిక
ప్రజా పిలుపు / తెలంగాణ / సంగారెడ్డి : పటాన్చెరు పారిశ్రామిక వాడకు చెందిన యువ బాక్సర్ బచ్చు హేమంత్ ముదిరాజ్ బాక్సింగ్‌లో అద్భుత ప్రతిభ కనబరిచి స్వర్ణ పతకాన్ని సాధించాడు. సెప్టెంబర్ 5న సరూర్‌నగర్ ఇండోర్ స్టేడియంలో నిర్వహించిన సౌత్ జోన్ స్టేట్ బాక్సింగ్ ఛాంపియన్‌షిప్‌లో 50 నుంచి 55 కిలోల బరువు విభాగంలో హేమంత్ ముదిరాజ్ ప్రత్యర్థులపై అద్భుతమైన ప్రతిభ కనబరిచి విజేతగా నిలిచాడు.ఈ పోటీల్లో హేమంత్ ముదిరాజ్ తన పోరాట పటిమ, వేగం, క్రమశిక్షణతో ఆకట్టుకుని స్వర్ణ పతకాన్ని కైవసం చేసుకున్నాడు. ఈ విజయంతో జాతీయ స్థాయి పోటీలకు హేమంత్ ఎంపికయ్యాడు. సెప్టెంబర్ 17 నుంచి 19వ తేదీ వరకు బెంగళూరులోని కోరమంగళ ఇండోర్ స్టేడియంలో జరగనున్న జాతీయ సౌత్ జోన్ బాక్సింగ్ ఛాంపియన్‌షిప్‌లో తెలంగాణ రాష్ట్రం తరఫున హేమంత్ ముదిరాజ్ ప్రాతినిధ్యం వహించనున్నాడు.హేమంత్ ముదిరాజ్ ఈ స్థాయికి ఎదగడంలో ఆయన కోచ్ గిరి బాబు అందించిన శిక్షణ, మార్గదర్శకత్వం ఎంతో కీలకంగా నిలిచాయి. కోచ్ గిరి బాబు ఆధ్వర్యంలో నిరంతరం కఠోర శిక్షణ పొందుతూ, క్రమం తప్పకుండా సాధన చేస్తూ హేమంత్ తన ప్రతిభను మెరుగుపరుచుకున్నాడు. పట్టుదల, కృషి, కోచ్ సూచనలను పాటిస్తూ ముందుకు సాగిన హేమంత్ రాష్ట్రస్థాయి పోటీల్లో స్వర్ణ పతకం సాధించి తన సత్తాను చాటుకున్నాడు.హేమంత్ ముదిరాజ్ స్వర్ణ పతకం సాధించి జాతీయ స్థాయి పోటీలకు ఎంపిక కావడంతో కుటుంబ సభ్యులు, పటాన్చెరు పారిశ్రామిక వాడ ప్రజలు, ముదిరాజ్ సంఘం నాయకులు, క్రీడాభిమానులు హర్షం వ్యక్తం చేశారు. యువత క్రీడల వైపు అడుగులు వేయడానికి హేమంత్ విజయం స్ఫూర్తిగా నిలుస్తుందని పలువురు పేర్కొన్నారు.ఈ సందర్భంగా పటాన్చెరు ముదిరాజ్ సంఘం ఆధ్వర్యంలో ముదిరాజ్ భవన్‌లో బచ్చు హేమంత్ ముదిరాజ్‌ను ఘనంగా సత్కరించారు. సంఘం ప్రతినిధులు, నాయకులు హేమంత్‌ను అభినందిస్తూ జాతీయ స్థాయి పోటీల్లోనూ ఇదే ఉత్సాహంతో రాణించి విజయం సాధించాలని ఆకాంక్షించారు. తెలంగాణ రాష్ట్రానికి, పటాన్చెరు ప్రాంతానికి మరింత పేరు ప్రతిష్ఠలు తీసుకురావాలని వారు కోరారు.జాతీయ స్థాయి పోటీల్లో హేమంత్ ముదిరాజ్ అత్యుత్తమ ప్రతిభ కనబరిచి పతకం సాధించి పటాన్చెరు ప్రాంత ఖ్యాతిని మరింత పెంచాలని కుటుంబ సభ్యులు, కోచ్ గిరి బాబు, ముదిరాజ్ సంఘం ప్రతినిధులు, స్థానికులు ఆకాంక్షించారు. యువ బాక్సర్‌గా హేమంత్ మరింత ఉన్నత స్థాయికి ఎదిగి భవిష్యత్తులో రాష్ట్ర, జాతీయ స్థాయిలో మరిన్ని విజయాలు సాధించాలని వారు ఆశాభావం వ్యక్తం చేశారు.
Admin
ప్రజా పిలుపు
మరిన్ని వార్తలు
Developed By :
