అర తులం బంగారం కోసం వృద్ధురాలి దారుణ హత్య
మీర్పేట్లో కలకలం.. గోనె సంచిలో మృతదేహాన్ని పడేసిన నిందితుడు
ప్రజా పిలుపు / తెలంగాణ / హైద్రాబాద్ : అర తులం బంగారం, రూ.10 వేల నగదు కోసం ఓ వృద్ధురాలిని హత్య చేసిన ఘటన హైదరాబాద్లోని మీర్పేట్లో కలకలం రేపింది. స్కూల్లో ఆయాగా పనిచేస్తూ ముగ్గురు మనవరాళ్లను పోషిస్తున్న కమలమ్మను చిప్స్ షాప్ నిర్వాహకుడు ప్రకాష్ హత్య చేసినట్లు పోలీసులు గుర్తించారు.పోలీసుల వివరాల ప్రకారం.. అటుగా వెళ్తున్న కమలమ్మను ప్రకాష్ తన చిప్స్ షాప్లోకి పిలిచాడు. ఆమె చెవులకు ఉన్న అర తులం బంగారు కమ్మలు, వద్ద ఉన్న రూ.10 వేల నగదుపై కన్నేసిన నిందితుడు ఆమెను హత్య చేసినట్లు తెలుస్తోంది.హత్య అనంతరం మృతదేహాన్ని గోనె సంచిలో కట్టి షాప్ సమీపంలోని నీటి సంపులో పడేసినట్లు పోలీసులు గుర్తించారు. కమలమ్మ అదృశ్యంపై కుటుంబ సభ్యులు ఇచ్చిన సమాచారంతో దర్యాప్తు చేపట్టిన పోలీసులు పరిసర ప్రాంతాల్లోని సీసీ కెమెరాల ఫుటేజీని పరిశీలించారు.సీసీ ఫుటేజీ ఆధారంగా అనుమానితుడిని గుర్తించిన పోలీసులు ప్రకాష్ను అదుపులోకి తీసుకుని అరెస్ట్ చేశారు. ఘటనకు సంబంధించిన పూర్తి వివరాలను పోలీసులు దర్యాప్తు చేస్తున్నారు. వృద్ధురాలి హత్యతో స్థానికంగా తీవ్ర విషాదం నెలకొంది.
Admin
ప్రజా పిలుపు
మరిన్ని వార్తలు
Developed By :
