పటాన్చెరు పారిశుద్ధ్యానికి రూ.12 కోట్లతో ఆధునిక వాహనాలు
తోషిబా సీఎస్ఆర్ నిధులతో 10 స్వీపింగ్ మిషన్లు, 10 టిప్పర్లు.. ప్రారంభించిన ఎమ్మెల్యే జీఎంఆర్
ప్రజా పిలుపు / తెలంగాణ / సంగారెడ్డి : పటాన్చెరు: నియోజకవర్గంలో పారిశుద్ధ్య నిర్వహణను మరింత పటిష్టం చేసేందుకు ఎమ్మెల్యే గూడెం మహిపాల్ రెడ్డి ప్రత్యేక చొరవ తీసుకున్నారు. తోషిబా పరిశ్రమ సీఎస్ఆర్ నిధులతో రూ.12 కోట్ల వ్యయంతో కొనుగోలు చేసిన 10 స్వీపింగ్ మిషన్లు, 10 టిప్పర్లను అందుబాటులోకి తీసుకొచ్చారు.సోమవారం పటాన్చెరు మైత్రి మైదానంలో నిర్వహించిన కార్యక్రమంలో ఎమ్మెల్యే జీఎంఆర్, తోషిబా పరిశ్రమ హెచ్‌ఆర్ డైరెక్టర్ మారు మోటోతో కలిసి తొలి విడతలో ఐదు స్వీపింగ్ మిషన్లు, ఐదు టిప్పర్లను ప్రారంభించారు. అమీన్పూర్ సర్కిల్‌కు మూడు స్వీపింగ్ మిషన్లు, మూడు టిప్పర్లు, పటాన్చెరు సర్కిల్‌కు రెండు స్వీపింగ్ మిషన్లు, రెండు టిప్పర్లను కేటాయించినట్లు తెలిపారు. బీహెచ్ఈఎల్ నుంచి ఇస్నాపూర్ వరకు జాతీయ రహదారి పరిశుభ్రతకు ప్రత్యేక స్వీపింగ్ మిషన్ ఏర్పాటు చేసినట్లు వెల్లడించారు.ఈ సందర్భంగా ఎమ్మెల్యే మాట్లాడుతూ.. నియోజకవర్గంలో పెరుగుతున్న జనాభా, నూతన కాలనీలకు అనుగుణంగా పారిశుద్ధ్య సేవలను మెరుగుపరచడమే లక్ష్యమన్నారు. ప్రతి డివిజన్‌కు స్వీపింగ్ మిషన్, టిప్పర్, జేసీబీ అందుబాటులో ఉండేలా చర్యలు తీసుకుంటున్నట్లు తెలిపారు. తొమ్మిది డివిజన్లలో సిబ్బంది కొరత తీవ్రంగా ఉందని, మరణించిన పారిశుద్ధ్య కార్మికుల స్థానాల్లో కొత్త నియామకాలు చేపట్టాలని ప్రభుత్వానికి విజ్ఞప్తి చేశారు. ప్రజలు కూడా రోడ్లపై చెత్త వేయకుండా మున్సిపల్ వాహనాలకు అందించి పరిశుభ్రతకు సహకరించాలని కోరారు. తోషిబా పరిశ్రమ ఎండీ మారు మోటో మాట్లాడుతూ నియోజకవర్గ అభివృద్ధికి తమ పరిశ్రమ ఎల్లప్పుడూ సహకరిస్తుందని తెలిపారు. శేరిలింగంపల్లి జోనల్ కమిషనర్ అమిత్ నారాయణ్ మాట్లాడుతూ సీఎస్ఆర్ నిధులతో పారిశుద్ధ్య వాహనాలు సమకూర్చడం అభినందనీయమన్నారు.ఈ కార్యక్రమంలో పటాన్చెరు, అమీన్పూర్ సర్కిళ్ల డిప్యూటీ కమిషనర్లు కావ్య, లలిత శ్రావణి, తోషిబా పరిశ్రమ ప్రతినిధులు, మాజీ కార్పొరేటర్లు, మాజీ ప్రజాప్రతినిధులు, బల్దియా అధికారులు, నాయకులు, కార్యకర్తలు పాల్గొన్నారు.
Admin
ప్రజా పిలుపు
మరిన్ని వార్తలు
Developed By :
